Siglir tar il cuntegn

Naziunal/Internaziunal Svizra perda en il Wembley

La naziunala Svizra da ballape sto tremblar vinavant per la qualificaziun per l’Euro 2016. L’equipa da Vladimir Petkovic ha pers l’otgavel gieu da qualificaziun en il Wembley a Londra encunter l’Engalterra cun 0:2.

Wayne Rooney nizzegia in penalti encunter Yann Sommer.
Legenda: Cun ses gol al 2:0 ha Wayne Rooney scrit in ulteriur chapitel istorgia da ballape. Keystone

Ils Svizzers han mussà in gieu solid en il Wembley, il stadion legendar da Londra. L’equipa da Petkovic ha giugà cumpact, ha fatg tant sco nagins sbagls e tegnì ils attatgaders englais sin distanza. La scena decisiva è lura capitada en la 67avla minuta. Lura ha Harry Kane nizzegià ina da las sulettas schanzas dals Englais al 1:0.

Ronney cun ina marca istorica

Sco gia encunter la Slovenia ha la Svizra anc ina gia auzà il tempo las davosas minutas. En cumparegliaziun cun il davos gieu da qualificaziun a Basilea n’èsi dentant betg reussì d’egualisar ni schizunt volver il gieu. Il cuntrari: 7 minutas avant la fin fa Granit Xhaka in foul envers Raheem Sterling. La consequenza è in penalti. Wayne Rooney nizzegia quel al 2:0 e scriva uschia ina part istorgia da ballape englaisa. Per l’attatgader da Manchester United èsi stà il 50avel gol en il tricot da la naziunala englaisa. Quai munta in record. Rooney ha ussa tutgà ina gia dapli che Bobby Charlton.

4 puncts en dus gieus

Per sa qualifitgar directamain per il campiunadi d’Europa en Frantscha dovra la Svizra ussa 4 puncts ord ils davos dus gieus a chasa encunter il San Marino ed ordaifer encunter l’Estonia. En la tabella resta la Svizra sin il segund plaz cun 15 puncts, 3 puncts avant la Slovenia e 5 puncts avant l’Estonia. Per ils Englais ch’en gia sa qualifitgads per l’Euro 2016 èsi stà l’otgavla victoria en l’otgavel gieu da qualificaziun.

RR novitads 23.00