Siglir tar il cuntegn
Inhalt

Naziunal/Internaziunal Svizra gudogna turnier ad Arosa

L’equipa naziunala svizra gudogna il final da l’Arosa Challenge cunter la Slovachia suenter sajettar penaltis cun 3:2. Cunquai festivescha il nov trio da trenaders gist tar lur premiera l’emprima victoria d'in turnier.

L’equipa naziunal svizra da hockey sa legra ch’il cletg è stà da lur vart.
Legenda: L’equipa naziunal svizra da hockey sa legra suenter il sajettar penaltis ch’il cletg è stà da lur vart. Keystone

Premiera grategiada per Patrick Fischer, Felix Hollenstein e Reto von Arx. L’equipa naziunala svizra da hockey gudogna il turnier da l’Arosa Challenge sut la batgetta dals trais novs trenaders.

Reto Suri e Marc Wieser ha nudà ils gols decisivs per ils Svizzers durant sajettar penalti. Tar ils Slovacs per il capitani Martin Barkos ch’ha fatg ses penalti.

Da sanester: Il schef-trenader Patrick Fischer cun ses dus assistents Reto von Arx e Felix Hollenstein
Legenda: Da sanester: Il schef-trenader Patrick Fischer cun ses dus assistents Reto von Arx e Felix Hollenstein Keystone

Vulvì il gieu aifer 4 minutas

En il temp regular da la partida era l’equipa svizra suenter 30 minutas anc enavos cun 0:1. Dentant han ils hockeyans svizzers pudì midar la partida grazia a dus spert gols en il segund terz. Kevin Romy ha sajettà il 1:1 en la 31avla minuta e Gaëtan Haas ha sajettà ils Svizzers en avantatg 4 minutas pli tard cun in bel gol da powerplay.

A l’entschatta da l’ultim terz ha Pavol Skalicky pudì profitar d’in sbagl dals defensurs svizzers suenter in chasti scadì. Il Slovac ha uschia persuls avant il gol svizzer puspè pudì egualisar la partida al 2:2.