Siglir tar il cuntegn
cuntegn

Naziunal/Internaziunal Svizra batta la Germania en l'ultim gieu da test

En il davos gieu da preparaziun per il campiunadi mundial da hockey sin glatsch en la Russia ha la Svizra gudagnà a Basilea cunter la Germania cun 4:3 suenter prolungaziun. Suenter la mesadad dal gieu manavan ils Tudestgs anc cun 3:0.

equipa naziunala da hockey sin glatsch sa legra suenter la victoria
Legenda: Legria suenter avair gudagnà il gieu malgrà in retard da 0:3 Keystone

Per l'emprima giada dapi 28 onns ha l'equipa naziunala svizra gudagnà in gieu suenter in retard da trais gols. (Ils 29 da december 1988 eran ils Svizzers fin la 50avla minuta en retard cun 1:4 cunter la Pologna, grazia a 4 gols entaifer 8 minutas ha la Svizra anc gudagnà cun 5:4). Gia la sonda passada ha l'equipa naziunala actuala mussà caracter. Lura era la Svizra cun dus gols en retard ed ha tuttina anc gudagnà. Era quai era capità l'ultima giada avant 15 onns.

Il campiunadi mundial dal hockey sin glatsch cumenza ils 6.5.2016. Mesemna sgola la Svizra a Moscau e la fin da l'emna datti ils emprims gieus. La sonda cunter il Casachstan e la dumengia cunter la Norvegia.

RR novitads 6:00