Siglir tar il cuntegn
Inhalt

Naziunal/Internaziunal Success dubel per Marc Gianola

Al medem di che la 91avla ediziun da la Cuppa Spengler va a fin sco success per il comitè d'organisaziun, surpiglia il schef da quel in'ulteriura sfida: Marc Gianola surpiglia per immediat il management dal HCD. Quai ha communitgà il club da hockey da Tavau la dumengia saira.

Il gestiunari dal HCD d’enfin qua era l’anteriur CEO dal FC Son Gagl Bill Mistura. Quel banduna il HCD suenter bunamain tschintg stagiuns. Sco giugader e captain dal HCD era Marc Gianola vegnì quatter giadas campiun.

Il presidi per la Cuppa Spengler aveva Gianola surpiglià gia l’entschatta dal 2016.

91avla Cuppa Spengler è gartegiada

Cun la participaziun da l'equipa naziunala Svizra ha la Cuppa Spengler 2017 gì in punct culminant sportiv. Persuenter han duas equipas betg pudì tegnair pitg al rest. Ils Finlandais da Hämeenlinna e l'equipa da la Lettonia, Dinamo Riga, n'han betg persvadì.

Quai di er il president dal comité d'organisaziun Marc Gianola. Cunquai ch'els fetschian cun las equipas gia ditg ordavant ils contracts na saja betg enconuschent en tge furma che las equipas èn enfin a la Cuppa Spengler.

Team Canada resta, equipa russa duai vegnir

Plaschair ha Marc Gianola, ch'ils organisaturs hajan pudì prolungar il contract cun il Team Canada per ulteriurs tschintg onns.

Finamira per l'auter onn saja plinavant da pudair engaschar in'equipa da la Russia. La Cuppa Spengler vegn ad avair lieu er il 2018 sco usità davent dals 26 enfin ils 31 da december.

RR Sportissimo 17:05