Siglir tar il cuntegn

Header

Stan Wawrinka
Legenda: Stan Wawrinka persvada vinavant a l'Australian Open 2015. Keystone
cuntegn

Naziunal/Internaziunal Stan Wawrinka en il quart-final da l’Australian Open

Stan Wawrinka ha cuntanschì il quart-final da l’Australian Open 2015. Il Romand ha battì en l’otgavelfinal il spagnol Guillermo Garcia-Lopez en quatter sets cun 7:6 (7:2), 6:4, 4:6 e 7:6 (10:8). Il proxim adversari da Wawrinka, il defensur dal titel a Melbourne, è Kei Nishikori.

Al cumenzament dal gieu ha tut vesì ora suenter in clera victoria da Stan Wawrinka encunter Guillermo Gacia-Lopez. Suenter ch’il Spagnol ha dentant pudì gudagnar il terz set era Garcia-Lopez er sin buna via da gudagnar il quart set. En il tiebreak da quel manava Garcia-Lopez cun 5:0 e 6:2. Wawrinka ha pudì volver quest tiebreak ed uschia pudì triumfar suenter passa 3 uras.

Ussa spetga Kei Nishikori

Suenter la victoria encunter Guillermo Garcia-Lopez ha Stan Wawrinka ussa gudagnà 11 gieus en seria a Melbourne. Plinavant ha Wawrinka er pudì far revantscha encunter il Spagnol per la greva terrada en l’emprima runda dal French Open l’onn passà.

En il quart-final frunta Wawrinka ussa sin Kei Nishikori (ATP 5) ch’ha pudì triumfar en l’otgavelfinal encunter il spagnol David Ferrer (ATP 10) en trais sets. Encunter il Giapunais ha Wawrinka anc in quint avert. Al US Open 2014 veva il Romand pers encunter Nishikori en il quart-final, quai en 5 sets.