Siglir tar il cuntegn

Header

cuntegn

Naziunal/Internaziunal Solid, dentant betg bun avunda per ina naziun da skis

Cun il final da la cuppa mundiala da ski alpin a Méribel en Frantscha è ida a fin la stagiun da skis 2014/2015. Las cullas da cristal èn vegnidas surdadas. Las duas grondas cullas van als skiunzs austriacs, Marcel Hirscher ed Anna Fenninger, il retg e la regina da la davosa stagiun.

Mo siemiar d’ina culla da cristal han skiunzas e skiunzs svizzers pudì en questa stagiun. La differenza culs gronds cracs, cun la crème de la crème è stada memia gronda. La Svizra ha mussà in stagiun solida, dentant tuttina memia pauc per ina naziun da skis. Quai mussa er il classament general da la naziuns. La Svizra ha pers in plaz ed è classada da nov sin il terz plaz, davos l’Austria e l’Italia.

Gudagnà il pli impurtant titel

La pli gronda ed impurtanta victoria la davosa stagiun va a la Svizra. Patrick Küng ha triumfà en la cursa roiala, la cursa rapida dal campiunadi mundial a Vail/Beaver Creek. Plinavant ha Beat Feuz gudagnà bronz. Procurà per in exploit han ils skiunzs svizzers er a la cursa da chasa, il classicher dal Lauberhorn. Cun Beat Feuz sco segund, Carlo Janka sco terz e Patrick Küng sco quart davos il victur austriac Hannes Reichelt èn gist trais skiunzs svizzers stads classads en ils top 4. Plinavant èn anc quatter ulteriurs Svizzers stads classads sut ils megliers 12. Pia gist en duas da las pli impurtants cursas insumma han ils skiunzs svizzers persvadì.

audio
Mezdi: Bilantscha da la stagiun dal campiunadi mundial da skis
ord Actualitad dals 23.03.2015.
laschar ir. Durada: 5 minutas 48 Secundas.

In ulteriur pass enavant

In dals gronds trumfs svizzers è e resta Carlo Janka. Il skiunz da Sursaissa ha pudì far en questa stagiun in ulteriur grond pass enavant. Janka ha cuntanschì 10 giadas in plaz en ils top 10, duas giadas è el stà sin il podest e tranter auter ha el gudagnà la supercumbinaziun da Wengen. Er al campiunadi mundial a Vail/Beaver Creek ha Janka mussà bunas prestaziuns cun ils plazs 6, 9, 11 e 12, per ina medaglia n’hai dentant tuttina betg tanschì. Che Carlo Janka auda tranter ils megliers skiunzs da la cuppa mundiala mussa il resultat ch’el è classa sco 10avel en il classament general da la cuppa mundiala. Vegn Carlo Janka da far in ulteriur pass enavant cun ses nov material è il campiun olimpic e campiun mundial franc e segir puspè in candidat per medaglias e victorias.

Artitgels legids il pli savens