Malgrà la bellezza aura da stad, l’avantmezdi sa chattan ils skiunzs en il center da fitness. Il trenar forza è ina impurtanta part dal trenament da stad. E quests trenaments èn la finala impurtants per avair ina buna basa sin che la nova stagiun da skis cumenza.
Berthod e Viletta pon trenar a chasa
Da Swiss Ski èn 10 skiunzs da la partida al camp da trenament a San Murezzan. Sper il leader Beat Feuz er 6 skiunzs grischuns, Marc Berthod, Sandro Viletta, Fernando Schmed, Mauro Caviezel, Manuel Pleisch e Thomas Tumler. In camp tut spezial èsi oravant tut per Viletta e Berthod, ils dus engiadinais. Malgrà ch’els pudessan ir a chasa la saira èn er els dus quest’emna l'entir temp cun l’equipa en l’hotel.
San Murezzan 2017
Sin il pli tard en bun in onn e mez, il fevrer 2017, vulan tuts puspè turnar enavos en l’Engiadina. Il favrer 2017 organisescha San Murezzan numnadamain ils proxims campiunadis mundials da skis. Oravant tut per Marc Berthod fissan quai ils campiunadis da chasa e pli probabel sia davosa schanza d’anc gudagnar ina giada ina medaglia ad in eveniment grond.