Cun il quart plaz da Wendy Holdener, il tschintgavel da Michelle Gisin ed il 9avel da Mélanie Meillard han las dunnas svizras mussà ina buna prestaziun per il cumenzament da la stagiun.
Gudagnà il slalom a Levi en Finlanda ha la Slovaca Petra Vlhova avant l'Americana Mikaela Shiffrin e l'Austriaca Katharina Liensberger. Quest podest correspunda precis a la classificaziun finala da l'ulitma stagiun.
Comeback da Mélanie Meillard gartegià
Suenter sia greva blessura vid il schanugl che ha fatschentà l'atleta da Neuchâtel durant trais onns, ha ella pudì mussar cun il 9avel plaz ina buna prestaziun. Cun il numer da partenza 32 è ella rivada suenter l'emprim percurs sin plazza 15 ed è lura en il segund percurs anc ina giada vegnida da sa meglierar per sis plazs.