I va per tut u nagut. Ils dus gieus da barrage, oz a Belfast e dumengia en il St. Jakob-Park a Basilea, han in caracter da final. Tant l’Irlanda dal Nord sco er la naziunala Svizra han be ina finamira, gudagnar quest duel ed uschia pudair sa participar cun las meglras equipas dal mund al proxim grond turnier en Russia.
Las schanzas èn 50:50, tuttina vala l’equipa da Vladimir Petkovic sco il favurit. La Svizra è classada meglier en la rangaziun mundiala da la FIFA, ha persvadì durant l’entira qualificaziun cun gudagnar nov da 10 gieus e la Svizra posseda er ils megliers giugaders, tals che dattan tar gronds clubs en las meglras ligas europeicas. Ils Irlandais dal Nord da l’auter maun n’han nagins stars en lur retschas, persvadan dentant sco equipa cun ina ferma defensiun. Lantschar conters e nizzegiar las situaziuns da standard, quai èn lur grondas fermezzas. Plinavant ha l’Irlanda dal Nord en l’emprim gieu da barrage il public da sia vart che quinta sco il 12avel um sin il plaz. Sin la naziunala Svizra spetga en mintga cas in dir cumbat en il Windsor Park a Belfast.
Il gieu cumenza a las 20:45 uras. A partir da las otg rapporta il Radio Rumantsch live da quest emprim gieu da barrage tranter l’Irlanda dal Nord e la naziunala Svizra. Il gieu da return è dumengia a las 18:00 uras a Basilea.
RR actualitad 11:00