Siglir tar il cuntegn
cuntegn

Naziunal/Internaziunal Simona Meiler sa retira dal sport da prestaziun

La snowboardista da Flem è sa participada mintgamai trais giadas a gieus olimpics ed a campiunadis mundials.

Simona Meiler.
Legenda: Simona Meiler. Keystone

La snowboard-crossra da 28 onns, Simona Meiler, sa retira dal sport da prestaziun. Quai ha ella communitgà la gievgia. Cun ella sa retira ina da las meglras snowboard-crossras da la Svizra.

Cun 16 onns è Simona Meiler stada l'emprima giada a la partenza da la cuppa mundiala. Dus onns pli tard è la snowboard-crossra da Flem sa participada ad in campiunadi mundial ed il medem enviern er gist gudagnà il classament da la cuppa europea.

66 cursas durant 13 stagiuns

La stagiun d'enviern dal 2009/10 ha ella lura savì festegiar dus plazs da podest ed il novavel plaz als gieus olimpics a Vancouver. Durant 13 stagiuns è Simona Meiler ida a la partenza da 66 cursas da la cuppa mundiala en il snowboard-cross.

Uss saja temp per insatge nov. Uschia ha Simona Meiler declerà sia decisiun. Ella veglia sa concentrar il proxim temp sin ses studi da master. Il snowboard vegnia però vinavant a restar sia passiun – simplamain senza cursas.

RR novitads 06:00