Siglir tar il cuntegn

Naziunal/Internaziunal Seraina Friedli è ina candidata per l'equipa naziunala

Campiunessa svizra e victura da la cuppa svizra da ballape: quai ha Seraina Friedli da la Punt Chamues-ch pudì festivar la stagiun passada cun il FCZ. Il proxim pass fiss l'equipa naziunala. Lunsch davent n'è il goli da 22 onns betg. Ella è gia sin pichet per ils proxims gieus da la naziunala.

Seraina Friedli, il goli da 22 onns è gia uss sin pichet per ils proxims gieus da la naziunala.
Legenda: Seraina Friedli, il goli da 22 onns è gia uss sin pichet per ils proxims gieus da la naziunala. RTR, G.M. Maissen

La Svizra dat dus ulteriurs gieus da qualificaziun per l'EURO 2017 en l'Ollanda. Venderdi dat la Svizra ordaifer encunter l'Irlanda dal nord, mardi lura a chasa encunter la Tschechia. Ils emprims dus gieus da qualificaziun ha la Svizra gudagnà cler e bain cun 3:0 encunter l'Italia e cun 4:0 encunter la Georgia.

Cun da quels stupents resultats ha la trenadra naziunala Martina Voss-Tecklenburg strusch motivs per midar sia equipa. Mo la trenadra mira era en l'avegnir e tschertga candidatas pussaivlas per pli tard. Ina da quellas è Seraina Friedli. Per il proxim camp da trenament da la naziunala il schaner è Friedli era nominada. Bunas perspectivas per daventar ina giada giugadra naziunala.