Nino Schurter ha ina gia dapli demonstrà sia gronda classa en la disciplina cross-country. Il campiun mundial da Tersnaus è stà a Cairns a la testa da la partenza fin l’arrivada ed ha la finala gudagnà cun in avantatg da 3 secundas sin Maxime Marotte. Julien Absalon sco terz ha pers 27 secundas.
Per Nino Schurter èsi la 18avla victoria da la cuppa mundiala. Uschia ha el gudagnà ina cursa dapli ch'il pionier da mountainbike en Svizra, Thomas Frischknecht.
Show da Julien Absalon
Sper Nino Schurter è il Franzos Julien Absalon stà il grond victur dal di. Il dubel campiun olimpic ha gì in defect gia en l’emprima runda, pers uschia bun ina minuta e crudà ord ils top 30. Absalon ha però demonstrà ch’el auda anc adina tranter la crème de la crème en la scena da mountainbike. Il Franzos ha surpassà in suenter l’auter e la finala anc pudì far il pass sin il podest sco terz.
6 Svizzers en ils top 8
Sper Nino Schurter han anc tschintg ulteriurs mountainbikers Svizzers fatg ina buna figura a Cairns. Mathias Flückiger ha manchentà be per 12 secundas in plaz sin il podest ed è vegnì quart, Florian Vogel è vegnì 5avel. Omadus han uschia dumagnà la limita olimpica. Plinavant è Lars Forster vegnì 6avel, Matthias Stirnemann 7avel e Fabian Giger 8avel.
La proxima cursa da la cuppa mundiala è ils 22 da matg ad Albstadt en la Germania. Il punct culminant da l'onn è lura ils 21 d'avust. Lura stat sin il program la cursa olimpica a Rio de Janeiro en la Brasilia. Daventar campiun olimpic è la gronda finamira da Nino Schurter quest onn, igl è il sulet titel che manca en ses palmarès.
RR novitads 09:00