Siglir tar il cuntegn

Header

Navigaziun

Lars Forster, Mathias Flückiger, Florian Vogel
Legenda: Lars Forster, Mathias Flückiger, Florian Vogel – per ina giada in podest senza Nino Schurter. mad
cuntegn

Naziunal/Internaziunal Schurter na vegn betg a frida en la lozza

Tar sia emprima cursa da la stagiun en Svizra n’è Nino Schurter betg vegnì sin turas. Il campiun mundial ha stuì sa cuntentar tar la segunda etappa dal Swiss Bike Cup a Buchs SG cun il 9avel plaz.

Vegnì a frida il meglier cun la plievgia, la buglia e las temperaturas bassas a Buchs è Lars Forster. Il collega d’equipa da Schurter ha gia pudì sa distanziar dals ses pli gronds concurrents en l’emprima da sis rundas. Forster, ch'ha dacurt triumfà al Cape Epic en l’Africa dal Sid ensemen cun Schurter, ha la finala triumfà cun in avantatg da 26,7 secundas sin Mathias Flückiger. Quel ha gudagnà l’emprima etappa dal Swiss Bike Cup en il Tessin. Terz è Florian Vogel vegnì cun in retard da 41,5 secundas. Nino Schurter ha sco 9avel pers 2:33,8 minutas sin Lars Forster, il campiun d’Europa.

Terrada per las favuritas

Er tar las dunnas han las grondas favuritas gì da sbatter cun bletschas e fraidas. Jolanda Neff è vegnida segunda cun in retard da 35,4 secundas sin la victura Ramona Forchini che gudogna uschia sia segunda cursa da questa seria dal Swiss Bike Cup. Alessandra Keller ha schizunt pers 7 minutas sin Forchini ed ha la finala stuì sa cuntentar cun l'8avel plaz.

Giuvens sursilvans cun bunas prestaziuns

Ursin Spescha e Vital Albin
Legenda: da san. Ursin Spescha e Vital Albin, omadus U23 Andreas Wieland

Persvadì a Buchs han sco gia tar l’emprima cursa dal Swiss Bike Cup er Ursin Spescha e Vital Albin. Els partan dapi questa stagiun per il Thömus RN Swiss Bike Team, l’equipa da Ralph Näf. Spescha ha pers 6:15 minutas sin Lars Forster ed è la finala daventà 18avel tar ils umens d’elita. En la davosa runda è Spescha schizunt stà pli spert ch’il campiun olimpic Nino Schurter. Albin ha pers 7:24 minutas ed è vegnì 24avel. En las rangaziuns dals U23 èn Ursin Spescha e Vital Albin schizunt sa classads sco quart respectiv sisavel.

La proxima cursa dal Swiss Bike Cup è la fin d’emna dals 11 e 12 da matg als Bike Days a Soloturn.