Siglir tar il cuntegn
cuntegn

Naziunal/Internaziunal Schurter defenda il titel e resta campiun

Nino Schurter è e resta il campiun svizzer da mountainbike. El ha defendì ses titel a Langendorf. Il traidubel campiun mundial ha però stuì cumbatter fin la fin.

ils trais emprims dal campiunadi svizzer
Legenda: Il vegl e nov campiun svizzer da mountainbike Nino Schurter (entamez), sper ils ulterius sin il podest Florian Vogel (san.) e Lukas Flueckiger (dretg). Keystone

Pir en l'ultima runda ha Schurter pudì distanziar ses ultim concurrent Florian Vogel per 6 secundas. Terz è Mathias Flückiger.

Stirnemann campiunessa tar las dunnas

Nova campiunessa svizra da mountainbike è Kathrin Stirnemann ch'ha gudagnà a Langendorf avant Nathalie Schneitter. Jolanda Neff, la victura e dominatura da la cuppa mundiala, è ruclada ed ha stuì sa cuntentar cun il terz plaz.

Ulteriur ciclist da Tersnaus han festivà il titel

Sper Nino Schurter ha anc in auter ciclist da Tersnaus festivà il titel da campiun svizzer. Vital Albin è per la terza giada en seria campiun svizzer dals juniors. Ursin Spescha da Sevgein ch'aveva gudagnà l'onn passà argient, è vegnì 6avel.

Il vegl e nov campiun svizzer dals juniors Vital Albin è cun ses tierz titel en seria pia sin buna via da passar en ils gronds fastizs da ses convischin da Tersnaus Nino Schurter.

RR novitads 20:00