Siglir tar il cuntegn

Naziunal/Internaziunal Sauber e Force India portan plant tar l’UE

Las duas equipas da la furmla 1 Sauber e Force India han purtà plant tar l’Uniun europeica. Ellas planschan che las grondas equipas dicteschian la strategia da la furmla 1 e repartian a moda malgista ils daners da premis.

Felipe Nasr da l’equipa da Sauber avant Sergio Perez da l’equipa da Force India.
Legenda: Felipe Nasr da l’equipa da Sauber avant Sergio Perez da l’equipa da Force India. Keystone

Sauber e Force India sa refereschan sco i para sin l’artitgel 102 dal contract da l’UE. Quel scumonda a firmas cun ina posiziun da monopol da nizzegiar quel a disfavur da lur concurrents.

Clav intransparenta che preferescha equipas grondas

L’organisaziun da la furmla 1 cun ses schef Bernie Ecclestone repartia ils daners da premis e las bunificaziuns tenor ina clav intransparenta che prefereschia equipas grondas sco Mercedes ni Ferrari: quai sin donn e cust dad equipas pitschnas sco per exempel Sauber.

Sche la cumissiun da concurrenza da l’UE constatescha che la furmla 1 cuntrafetschia al dretg da l’UE, lura pudess quella pretender midadas e chastis da fin 10 pertschient da la svieuta.

RR novitads 18:00