Siglir tar il cuntegn
Inhalt

San Murezzan 2017 Per Gut è la stagiun a fin

Cun sa stgaudar en per il slalom da la cumbinaziun è Lara Gut cupitgada ed ha rut il liom cruschà ed è sa blessada vid il meniscus dal schanugl sanester. Per la Tessinaisa èn ils campiunadis mundials e la stagiun cunquai a fin.

La Tessinaisa è crudada sin il traject dal slalom ed è stada per terra per pli lung temp. Pli tard ha ella stuì vegnir transportada davent cun il helicopter en ina clinica a San Murezzan. Là è vegnì disgnostitgà ina ruptura dal liom cruschà ed ina blessura dal meniscus dal schanugl sanester. Suenter la cursa rapida da la cumbinaziun era Gut terza.

Tenor Swiss-Ski sto la blessura betg vegnir operada sco cas urgent. Davart il decurs terapeutic vegnia uschia decis pir aifer il proxims dis.

Deplorablamain na vegnin nus betg pli a vesair Gut sin skis questa stagiun.
Autur: Walter O. Freymedi da team

Il medi da team Walter O. Frey ha pli tard confermà envers SRF che Gut stoppia terminar anticipadamain la stagiun. «Deplorablamain na vegnin nus betg pli a vesair ella sin skis questa stagiun.» Malgrà la greva blessura haja Gut però reagì a moda professiunala, ha punctuà il medi da team.

Lara Gut valiva sco cunfavurita per il titel da campiunessa mundiala en la cursa rapida. Ella è plinavant la defensura dal titel en il classament da la cuppa mundiala ed avess er quest onn gì bunas schanzas da gudagnar la culla da cristal gronda.

RR novitads 14:00