San Murezzan 2017 - Jasmine Flury parta en la cursa rapida
Grazia a las bunas prestaziuns en ils trenaments per la cursa rapida ha Jasmine Flury segirà ina plazza da partenza per la cursa da dumengia. La Grischuna è uschia suenter Lara Gut e Fabienne Suter la terza skiunza che dastga cumbatter per ina medaglia en la cursa roiala.
Suenter il quart plaz en il prim trenament è Flury vegnida tschintgavla en il segund trenament. Quai cun in retard da bun ina segunda sin la Slovena Ilka Stuhec ch’ha er dominà il segund trenament.
Tgi che survegn il quart ed ultim plaz da partenza n’è anc betg vegnì decis, sco quai che Swiss Ski communitgescha. En dumonda vegnan Michelle Gisin e Corinne Suter. La decisiun vegn a crudar la sonda suenter l’ultim trenament.
