Siglir tar il cuntegn
Inhalt

San Murezzan 2017 Feuz danovamain cun in ferm trenament

Beat Feuz è pront per la cursa rapida da sonda. Il Bernais è vegnì segund en il davos trenament per il punct culminant da quests campiunadis mundials a San Murezzan. Il pli spert dal trenament è stà l'Austriac Vincent Kriechmayr.

Beat Feuz è danovamain stà in dals sperts en il trenament.
Legenda: Beat Feuz è danovamain stà in dals sperts en il trenament. Keystone

Beat Feuz ha pers en il segund trenament 1,3 secundas sin Vincent Kriechmayr. Il Svizzer ha dentant er fatg in zic il pokern. Avant l'arrivada ha Feuz numnadamain franà pulit, e tuttina hai tanschì per il segund meglier temp. Bunamain duas secundas han perencunter Carlo Janka e Patrick Küng pers sin l'Austriac.

Suenter 24 skiunzs era il trenament vegnì interrut pervia dal traject. Passa in'ura pli tard ha la FIS dentant decidì da cuntinuar cun il trenament. Dapli che sis skiunzs n'han dentant betg astgar parter.

Mani ha dastgà - Hintermann betg

Per il davos plaz da partenza cumbattan anc Niels Hintermann e Nils Mani. Durant che Mani ha dastgà ir a la partenza en quest trenament ed è la finala vegnì 7avel davos Carlo Janka n'ha Hintermann betg astgà trenar sin la pista da la Corviglia. Er betg dastgà trenar ha Mauro Caviezel ch'è dentant gia sa qualifitgà per la cursa rapida, quai ensemen cun Beat Feuz, Carlo Janka ed il campiun actual Patrick Küng.

La cursa rapida dals umens è sonda a las 12:00.

RR novitads 15:00