Siglir tar il cuntegn
Inhalt

San Murezzan 2017 Caviezel sa qualifitgà per la cursa rapida

Il skiunz grischun Mauro Caviezel dastga ir sonda, ils 11 da favrer, a la partenza da la cursa rapida als campiunadis mundials da skis a San Murezzan.

Mauro Caviezel
Legenda: Suenter il super-g e la cumbinaziun alpina dastga Mauro Caviezel er cumbatter en la cursa rapida per ina medaglia. Keystone

Grazia a sia bunas prestaziuns en las davosas cursas da la cuppa mundiala il schaner e la buna prestaziun en l’emprim trenament sin la pista Corviglia il mardi passà han ils responsabels da Swiss Ski decidì da qualifitgar Mauro Caviezel per la cursa roiala. Uschia possia il skiunz da 28 onns sa concentrar a partir d’immediat sin sias proximas cursas a quests campiunadis mundials, uschia il scheftrenader Thomas Stauffer.

I resta anc in plaz

Gia sa qualifitgads per la cursa rapida eran il campiun mundial dal 2015 Patrick Küng, Beat Feuz e Carlo Janka. Ussa vegn anc Mauro Caviezel vitiers. Damai che la Svizra ha l’actual campiun mundial dastgan tschintg svizzers ir a la partenza. Tgenin che survegn il davos plaz da partenza sper il quartet cun Küng, Feuz, Janka e Caviezel vegn decidì suenter il segund trenament. Ils trenaders ston decider tranter il skiunz da 21 onns Niels Hintermann ed il skiunz da 24 onns Nils Mani.

Suter definitiv a la partenza

Er tar las dunnas è gia vegnì surdà definitiv in plaz da partenza. Sper Lara Gut dastga er Fabienne Suter cumbatter en la cursa rapida da dumengia proxima per ina medaglia. Ils davos dus plazs da partenza vegnan pli probabel surdads suenter il segund trenament.