Siglir tar il cuntegn
cuntegn

Naziunal/Internaziunal Roger Federer en il 18avel tschiel

Roger Federer gudogna l’Australian Open 2017. Il «maestro» ha battì en il final a Melbourne ses grond rival Rafael Nadal. Il Svizzer ha gudagnà il crimi sur 5 sets cun 6:4, 3:6, 6:1, 3:6 e 6:3.

Suenter sis mais pausa pervia d’ina blessura ha Roger Federer cuntanschì insatge che nagin ha quintà. El ha encurunà ses comeback cun il 18avel titel da Grand Slam, l’emprim dapi Wimbledon 2012.

Federer ha giugà da gieu tar gieu meglier e meglier ed ha sin via a quest titel tranter auter eliminà il Tschech Tomas Berdych, il Giapunais Kei Nishikori e ses cumpatriot Stan Wawrinka. Il 5avel titel a Melbourne (2004, 2006, 2007, 2010, 2017) ha Federer la finala merità cun ina prestaziun fantastica cunter ses rival etern Rafael Nadal.

35avel duel cunter Rafael Nadal

En il 35avel duel cun il Spagnol Rafael Nadal ha Federer giugà senza cumpromiss. El ha empruvà l’entir temp da dictar il tempo e tegnair curt ils puncts ed uschia betg laschar vegnir Nadal en il gieu. Quai che Federer ha la finala mussà en il 5avel e set decisiv, quai suenter ch’el era enavos cun in break, e simplamain stà brigliant. Suenter 3 uras e 37 minutas è il gieu, il classicher i a fin, quai tar ina «standing ovation».

Sco emprim giugader insumma en l’istorgia dal tennis ha Roger Federer ussa gudagnà almain tschintg titels a trais differents turniers da Grand Slam, l’Australian Open, Wimbledon ed il US Open.

A partir da glindesdi, ils 30-01-2017, tutga Roger «King» Federer puspè tranter ils top 10 dal mund.

RR actualitad 14:00