Siglir tar il cuntegn
Inhalt

Naziunal/Internaziunal Rodriguez mida tar AC Milan

La midada da Ricardo Rodriguez da VfL Wolfsburg tar l'AC Milan è perfetg. Il giugader naziunal svizzer ha suttascrit in contract da 4 onns, quai ha communitgà il club talian. Ch'il defensur da 24 onns mida tar Milaun era gia vegnì speculà dapi intgin temp.

purtret dal ballapedist svizzer Ricardo Rodriguez
Legenda: Ricardo Rodriguez, il defensur e giugader da l'equipa naziunala mida en l'Italia. Keystone

Davart la summa da transfer n'è vegnì communitgà nagut. Tenor divers rapports da medias pudessia esser ina summa tranter 15 e 18 milliuns euros.

L'entschatta dal 2012 ha Rodriguez midà dal FC Turitg tar Wolfsburg. El ha giugà 149 gieus en la Bundesliga. Ses pli grond success è stà la victoria da la Cuppa da ballape tudestga il 2015. Il medem onn ha Wolfsburg terminà la stagiun sin plazza dus.