Siglir tar il cuntegn
Inhalt

Naziunal/Internaziunal Rodriguez avant midada tar Milan

Il ballapedist svizzer Ricardo Rodriguez mida sco i para en l'Italia tar l'AC Milan. Sco quai ch'igl è vegnì confermà ord il conturn dal Turitgais da 24 onns sajan sa cunvegnids Rodriguez ed il club da tradiziun talian.

Ricardo Rodriguez
Legenda: Banduna Ricardo Rodriguez la Bundesliga direcziun Serie A? Keystone

Il club actual da Rodriguez, il VfL Wolfsburg e l'AC Milan stoppian anc contractar davart las modalitads da transfer. Rodriguez ha en ses contract che dura fin la stad 2019 ina clausula da sortida da 22,5 milliuns euros.

VfL Wolfsburg en la crisa

Ricardo Rodriguez aveva midà il schaner 2012 per bun 8 milliuns dal FC Turitg tar Wolfsburg. Cun ils Tudestgs dal nord è el vegnì la stagiun 2014/2015 vice-campiun davos il FC Bayern München. Il medem onn ha Rodriguez gudagnà la cuppa tudestga cun il VfL.

La davosa sesiun ha Wolfsburg cuntanschì ils quart-finals da la Champions League. En questa stagiun è Wolfsburg dentant en la crisa. Duas rundas avant la fin dal campiunadi sa chatta il VfL Wolfsburg be sin il 14avel plaz da la tabella e sto uschia anc cumbatter cunter la relegaziun.

RR novitads 14:00