Siglir tar il cuntegn

Header

Navigaziun

Legenda: Tadlar il audio Saira: Avant grond final dals rivals eterns – Federer vs. Nadal. Durada 02:15 minutas.
02:15 min, Sportissimo dals 28.01.2017.
cuntegn

Naziunal/Internaziunal Rivals eterns cumbattan per il titel a Melbourne

Roger Federer encunter Rafael Nadal – quai è il final da l’Australian Open 2017. Omadus han cuntanschì a moda sensaziunala quest final a Melbourne. Igl è in final tranter dus rivals eterns, dus ch’han dominà il sport da tennis sur blers onns.

Il final Federer – Nadal è dentant ina pitschna surpraisa. Per Roger Federer èsi numnadamain ses turnier da comeback suenter ina pausa da sis mais. Er Nadal ha cumbattì ils davos onns cun blessuras e stuì terminar la davosa stagiun pli baud che planisà. Tant Federer sco er Nadal n’han questa giada betg tutgà tar ils topfavurits a quest turnier da Grand Slam.

Nadal cun megliera statistica

Il duel Roger Federer – Rafael Nadal hai gia dà 34 giadas, 23 giadas ha il Spagnol gudagnà, 11 giadas Roger Federer. E malgrà ch’il Svizzer ha gia gudagnà quatter giadas a Melbourne n’ha el mai pudì batter ses rival en la metropola australiana. Ina giada ha Federer pers a Melbourne en il final cunter Nadal, duas giadas en il mezfinal. Rafael Nadal ha perencunter triumfà sulet ina giada a l’Australian Open.

Entant che Roger Federer emprova da gudagnar ses 18avel turnier da Grand Slam, fissi per Rafael Nadal il 15avel titel.

Il final tranter Federer e Nadal cumenza la dumengia a las 09:30 uras.

RR sportissimo saira 17:00