Siglir tar il cuntegn

Olá Brasil Rio pront per la festa d’avertura

Bler spectacul ed intgins misteris – la festa d’avertura dals 31avels gieus olimpics da stad a Rio de Janeiro duai daventar ina parti sco quai che la Brasilia n’ha anc mai vis. Cun in budget relativ pitschen vulan ils organisaturs stgaffir «ina droga cun las depressiuns en la Brasilia».

Stadion Maracanã a Rio de Janeiro.
Legenda: Oz mira il mund vers Rio. En il stadion Maracanã vegnan averts ils gieus olimpics 2016. Keystone

Parti, carnaval e spectacul da samba: La festa d’avertura a Rio duai daventar in eveniment nunemblidaivel. «Ils Brasilians duain guardar la ceremonia e dir: Nus essan coola glieud, nus vegnin ord differentas gruppas etnicas, nus vivain ensemen, nus essan mai ir en la guerra, nus essan paschaivels», ha ditg Fernando Meirelles, manader artistic da la festa.

L’entira festa duai custar mo bun 9 milliuns euros. En cumparegliaziun: A Londra era vegnì dà ora otg giadas dapli avant quatter onns. La Brasilia sa chatta amez ina recessiun, ils daners èn stgars

En il stadion Maracanã, in dals pli gronds en populars stadions dal mund, vegnan 70’000 aspectaturs a persequitar la show. Avant las televisiuns vegn spetgà cun bun trais milliardas aspectaturs.

Il traffic pudess chaschunar problems

Avant l’entrada è l'ortulan anc vid plantar in pèr plantinas ed en ils sulers dal center da medias vegnan anc ils tarpuns tschentads. Ma las chaussas impurtantas èn prontas als gieus olimpics a Rio.

In problem pudess dentant il traffic chaschunar. En blers lieus da la citad datti gia avant l’avertura dals gieus olimpics lungas colonnas. Quai vala era per l’entrada al center da medias gigantic. Igl è da sperar per ils fans ch’i na dettia betg talas colonnas avant las entradas tar ils lieus da las concurrenzas.

RR actualitad 11:00