Siglir tar il cuntegn

Olá Brasil Nairas uras da cumprar regals

Ils gieus olimpics a Rio van vers la fin. Prest turnan noss reporters olimpics a chasa. Mo avant che turnar èsi anc spert da cumprar intgins regals per las charas a chasa.

elecziun enorma
Legenda: Il shop olimpic a Rio elecziun enorma RTR, Roger Alig

Vegnir cun mauns vits a chasa – quai na datti betg. Trais emnas davent da chasa e turnar senza regals – vegn gnanc en dumonda. Pia èsi da currer e tschertgar regals, x-insacura tranter duas cursas. En l’ultim mument enstagl da far quai gia a l’entschatta.

In souvenir ord il shop olimpic – prest impussibel da cumprar

Dacurt hai jau vulì cumprar dabot in souvenir en il shop gigantic da souvenirs amez il parc olimpic. Dabot è bun. Almain ina mes’ura sun jau stà en colonna per insumma vegnir viaden. Là datti in’elecziun enorma: T-shirts, chapellas, parasols, tastgas, satgados e da tuttas sorts da quels mascottins. Vinicius ha’l num, il mascottin olimpic da Rio. Kitsch nunpussaivel. La finala hai jau chattà in t-shirt. Mo quel hai jau lura betg pudì pajar. Jau aveva memia paucs daners en bar e la fallada carta da credit. En il shop olimpic accept’ins mo la carta da credit dal sponsur olimpic.

RR actualitad 12:00