Siglir tar il cuntegn

Olá Brasil Il sentiment da segirezza è sa midà

Gia avant che partir a Rio hai jau fatg blers patratgs pervi da la segirezza. Hai studegià, quant segir ch’igl è qua. Pervi da la criminalitad e pervi d’attentats da terrur.

forzas da segirtad a Rio
Legenda: Bunamain dapertut sin las vias a Rio è u la polizia u l'armada preschenta. RTR/Ursin Lechmann

Enfin uss, l’emprima emna, ils emprims 10 dis, sun jau ma sentì bain e segir qua a Rio. Dapi mardi è quai però sa midà in zic – dapi ch’ins ha udì, ch’i ha dà in'attatga sin in bus cun 12 schurnalists.

L'emprim èsi vegnì speculà ch'insatgi haja sajettà sin il bus. Fanestras da la vart dretga dal bus sajan vegnidas sfratgadas. Las scalgias hajan blessà dus schurnalists levamain. Tenor indicaziuns uffizialas n'ha nagin sajettà sin il bus, mabain bittà crappa sin quel. Quai ha confermà il schef da segirezza dals gieus olimpics, il general Luiz Fernando Correra. I sa tractia probabel da vandalissem e betg dad in'attatga cun intenziun da blessar insatgi. Plinavant ha el annunzià che la preschientscha da las forzas da segirezza vegnian augmentadas. I dettia dapli posts da controlla e policists che patruglieschian.

Il bus era sin via dal stadio da rugby al center da medias principal. Il sentiment da segirezza è dapi quest incap tuttina sa midà – almain per mai persunalmain. E quai malgrà che las controllas da segirezza e la preschientscha da la polizia e l’armada vegnan uss anc augmentadas.

RR actualitad 12:00