Siglir tar il cuntegn

Rio 2016 Nagina medaglia per Fabian Cancellara

Il quartet svizzer enturn Fabian Cancellara n'ha la fin finala gì nagina influenza sin la decisiun da la cursa ch'il Beltg Greg van Avermaet ha gudagnà suenter in final dramatic.

Cursa da velo.
Legenda: Cursa da velo davant la culissa magica da la Copacabana a Rio. Keystone

Il Beltg Greg van Avermaet gudogna la medaglia d’aur en la cursa da velo sin via sur 237,5 kilometers a Rio. Sin il segund plaz suonda il Danais Jakob Fuglsang. Terz daventa il Polac Rafal Maijka. En la davosa descensiun è il leader da fin qua, il Talian Vincenzo Nibali, cupitgà.

Svizzers senza schanzas

Il quartet svizzer Cancellara, Albasini, Morabito e Reichenbach ha mussà ina cursa engaschada. A la fin han dentant auters cumbattì per las medaglias. Meglier Svizzer è stà il Vallesan Sebastien Reichenbach sco 19avel cun bun 3:30 minutas retard. Cancellara suonda sin il 34avel plaz. Steve Morabito ha stuì dar si la cursa pervi da problems tecnics. Medemamain betg finì la cursa ha Michael Albasini. Er il victur dal Tour de France e co-favurit Chris Froome da la Gronda Britannia n’ha gì naginas schanzas sin medaglias ed è vegnì 12avel.

Ultims gieus olimpics per Cancellara

Per Fabian Cancellara è quai gia stà la quarta participaziun a gieus olimpics en sia carriera. En la cursa cunter l'ura l'autra mesemna ha il Bernais la schanza da gudagnar sia terza medaglia a gieus olimpics. La fin da questa stagiun terminescha el sia lunga carriera sco profi.

Fabian Cancellara aveva gudagnà il 2008 a Peking aur en la cursa sin via ed argient en la cursa cunter l'ura. Als gieus olimpics 2012 a Londra è el cupitgà en la cursa sin via cura ch'el è stà a la testa. Silsuenter ha el stuì dar si la cursa.

RR novitads 21:00