Siglir tar il cuntegn

Boa tarde Rio Quarts ed ultims gieus olimpics da Sven Riederer

Athen, Peking, Londra ed ussa Rio. Cun ses quarts gieus olimpics va la carriera olimpica da Sven Riederer a fin. Ses pli grond success ha il triatlet svizzer festivà avant 12 onns ad Athen cun la medaglia da bronz.

Sven Riederer ad ina cursa a Genevra
Legenda: Sven Riederer parta a Rio a sia ultima cursa olimpica. Keystone

Andrea Salvisberg e Sven Riederer èn ils dus svizzers che partan al triatlon olimpic a Rio de Janeiro. Per Andrea Salvisberg èsi ses emprims gieus olimpics, per Sven Riederer gia ils quarts. In ni l’auter sa regorda forsa anc co Riederer ha passà avant 12 onns sco terz la lingia d’arrivada ad Athen, è stà eri sin quella ed ha fatg ina reverenza al public, sco sin ina tribuna da teater.

Riederer sa senta bain a Rio

A la Copacabana, la riva legendara da Rio de Janeiro, è la partenza e l’arrivada dal triatlon olimpic. Gest qua en in appartament han ils triatlets svizzers lur dimora, lunsch davent dal vitg olimpic. Quai spargna temp ed è cumadaivel. Tar ses ultims gieus olimpics s’auda Sven Riederer betg tar ils favurits. Ina medaglia sco ad Athen fiss ina surpraisa. Riederer è dentant tuttina ambiziuns. Sia finamira è da prender cumià cun ina cursa perfetga.