Siglir tar il cuntegn
Inhalt

Boa tarde Rio Nino Schurter e sias emprimas impressiuns da Rio

Per nus Rumantschs è l’ultim di dals gieus olimpics il punct culminant. Lura parta noss sulet atlet a sia cursa olimpica. Sco campiun mundial parta Nino Schurter sco topfavurit a la cursa olimpica da mountainbike.

Nino Schurter a la conferenza da pressa a Rio.
Legenda: Nino Schurter Il mountainbiker Rumantsch è pront per ils gieus olimpics. RTR, Roger Alig

Gia dapi in'emna è il mountainbiker da Tersnaus en la Val Lumnezia gia en Brasilia, dentant betg a Rio. Schurter ed ils auters mountainbikers svizzers han trenà en ina regiun in pau pli muntagnarda en la vischinanza. Uss è Nino Schurter dentant arrivà en il vitg olimpic ed ha era gia trenà in'emprima giada sin il percurs olimpic da Rio.

Schurter ha gudagnà la cursa da test

La cursa olimpica Rio è ina cursa artifiziala. Quai vul dir ch’ins ha construì bots e sigls. Cumpareglià cun ils percurs en la cuppa mundiala saja il percurs a Rio plitost simpels, dentant sperts. Nino Schurter di ch’il percurs saja da cumparegliar cun il percurs d’avant quatter onns a Londra. Avant in onn hai dà a Rio ina cursa da test. Schurter ha gudagnà quella, quai dettia fidonza.