Siglir tar il cuntegn

Header

Navigaziun

Il canu dubel en acziun.
Legenda: Ils frars Werro durant ils trenaments per Rio. Keystone
cuntegn

Boa tarde Rio Ils frars Werro e lur sport exotic als gieus olimpics

Gieus olimpics – quai è dapli che superstars sco Usain Bolt e Michael Phelps che gudognan medaglias dad aur tut a dubel. Olimpia – quai è era ina plattafurma per sports e sportists main enconuschents. In da quels sports è il canu dubel, il sport dals dus frars Lukas e Simon Werro.

Dus frars, ina bartgetta, in flum furibund

Dus che sesan ensemen en in canu ed han d’absolver in slalom en in flum furibund. Quai è il sport da Lukas e Simon Werro, il canu dubel. Als gieus olimpics è quai flum furibund in flum artifizial. L’aua curra adina tuttina uschia che tuts han las medemas cundiziuns. Per dumagnar uschia in slalom dovri tecnica e forza.

Canu dubel vul dir trair en la medema direcziun

Canu dubel saja “Teamwork” dian ils dus frars Lukas e Simon Werro. Ins stoppia sa chapir bain. Sco frars hajan els gia da chasa anora las medemas valitas e sa chapeschian bain, quai saja in avantatg.

Sa qualifitgads piz a cup

Cun prender part als gieus olimpics han Lukas e Simon Werro gia realisà in grond siemi. Mo piz a cup èn els insumma vegni da sa qualifitgar per Rio. Mo uss vulan ils dus frars nizzegiar lur schanza. Lur finamira è in plaz en ils top 8, quai fiss in diplom olimpic.

RR actualitad 17:00