Siglir tar il cuntegn

Header

cuntegn

Boa tarde Rio Diplom olimpic per Jolanda Neff

La ciclista svizra daventa otgavla en la cursa da velo sin via. Aur gudogna l'Ollandaisa Anna van der Breggen.

audio
Bunura: Reacziun Jolanda Neff suenter ses success
ord Actualitad dals 08.08.2016.
laschar ir. Durada: 2 minutas 10 Secundas.

Jolanda Neff è vegnida otgavla en la cursa sin via sur 136,9 kilometers e gudogna uschia in diplom olimpic. Gudagnà la cursa sin via ha l’Ollandaisa Anna van der Breggen. En il sprint ha ella battì la Svedaisa Emma Johansson e la Taliana Elisa Longo Borghini.

Jolanda Neff ha ademplì las pretensiuns ed ha fin la fin da la cursa pudì suandar a las meglras ciclistas sin via. Ma ils gieus olimpics n'èn anc betg a fin per Neff. La Svizra da 23 onns parta il segund davos di dals gieus olimpics en sia disciplina da parada da mountainbike, il «Cross Country», nua che Jolanda Neff vala sco ina da las favuritas per ina medaglia.

Grev accident da Van Vleuten

La cursa sin via è però stada sumbrivada d'ina cupitgada da la ciclista ollandaisa Annemiek van Vleuten. A la testa da la cursa è ella numnadamain cupitgada sin il tgau en la descensiun privlusa. Davart blessuras na datti anc naginas indicaziuns concretas. Van Vleuten è immediat vegnida transportada en l'ospital. Tenor las circumstanzas haja ella però detg pulit. Gia sonda eran plirs ciclists cupitgads en quest lieu. Tranter quels er il Talian Vincenzo Nibali che manava la cursa dals umens fin sia cupitgada.

audio
Jolanda Neff va "ester"
ord Sportissimo dals 07.08.2016.
laschar ir. Durada: 2 minutas.

Neff è ida «ester»

Fin qua ha Jolanda Neff fatg mo paucas cursas da velo sin via. Malgrà quai ha la spezialista da mountainbike dentant gia festivà emprims success en questa disciplina. Uschia ha Neff gudagnà la tura da la Pologna. Survalitar quai na vul ella dentant betg. Las meglras dal mund hajan mancà e sajan partidas il medem mument al Giro d’Italia da las dunnas.

Buns cussegls da Cancellara e cumpagnia

Per sa preparar sin la cursa olimpica da velo sin via ha Jolanda Neff trenà intgins dis cun l’equipa svizra dals umens enturn Fabian Cancellara. Quels hajan dà ad ella intgins buns cussegls per la cursa, oravant tut cussegls pertutgant la tactica ch’è diversa a quella da las cursas da mountainbike.

Mountainbike resta il sport numer 1 per Neff

Tge schanzas ch’ella haja saja grev da dir. Jolanda Neff na quinta betg sasezza tar las favuritas. Ella speria dentant dad esser pronta sch’i vess da dar ina schanza durant la cursa. Ses sport numer 1 resti dentant il mountainbike. Lezza cursa olimpica è lura ils 20 d’avust, il segund ultim di dals gieus olimpics da Rio.

RR novitads 22:00

Artitgels legids il pli savens