Tut en tut èn 109 atletas ed atlets svizzers s'annunziads per ils gieus olimpics a Rio de Janeiro en Brasilia. Quai è la pli gronda delegaziun per gieus da stad dapi 20 onns. Per 76 dad els èsi ina premiera olimpica.
Er sgulads il 1. d'avust vers Rio èn ils dus reporters Roger Alig ed Ursin Lechmann.
Sche tut va bain duai la delegaziun svizra turnar a chasa cun dapli medaglias che als ultims gieus olimpics il 2012 a Londra. Là aveva la Svizra gudagnà 4 medaglias. Duas dad aur (Nicola Spirig/triatlon e Steve Guerdat/chavaltgar) e duas d'argient (Nino Schurter/mountainbike e Roger Federer/tennis).
Entan che Federer n'è betg da la partida a Rio pervia da problems da sanadad valan Schurter, Guerdat e Spirig er quest onn sco gronds candidats da medaglia. Swiss Olympic ha ultra da quai nominà 22 represchentants che fan part als Paralympics a Rio a partir dals 7 da settember.
