Siglir tar il cuntegn
Inhalt

Naziunal/Internaziunal Revista 2017: In onn perfetg per Schurter e Federer

«Igl è stà la stagiun perfetga» – uschia ha il mountainbiker Nino Schurter resumà sia stagiun 2017. Schurter ha gudagnà il Cape Epic en l’Africa dal Sid e silsuenter tut las cursas da la cuppa mundiala. A la fin ha Schurter encurunà sia stagiun gigantica cun il 6avel titel da campiun mundial.

Sper Nino Schurter han anc auters sportists svizzers procurà per grond success quest onn, oravant tut Roger Federer. Tar ses comeback il schaner ha Federer gist triumfà a l’Australian Open a Melbourne. Cun ses 8avel titel a Wimbledon, il 19avel titel da Grand Slam, ha Federer rut in ulteriur record. Il sportist svizzer da l’onn ha la finala terminà la stagiun sco numer dus dal mund.

Per gronds success han plinavant er skiunzas e skiunzs svizzers procurà als campiunadis mundials da skis il favrer a San Murezzan. Beat Feuz (cursa rapida), Luca Aerni (cumbinaziun alpina) e Wendy Holdener (cumbinaziun alpina) han schizunt dastgà retschaiver la medaglia dad aur avant ils fans da chasa. Holdener ha plinavant anc gudagnà argient en il slalom ed è uschia stada la skiunza svizra cun il pli grond success a quests campiunadis mundials da chasa. Ulteriuras medaglias hai dà per Mauro Caviezel (bronz cumbinaziun alpina), Michelle Gisin (argient cumbinaziun alpina) e Lara Gut (bronz super-g).

Naginas medaglias hai dentant dà per passlunghistas e passlunghists svizzers als campiunadis mundials da ski nordic a Lahti en Finlanda. Duas giadas hai mancà pauc, tant la staffetta dals umens sco er Nathalie von Siebenthal en il skiatlon han mintgamai stuì sa cuntentar cun il quart plaz. A la fin dals campiunadis è Dario Cologna daventà 7avel en la cursa roiala, ils 50 kilometers.

Cun la fin da l’onn han era intgins sportists dà adia al sport, en emprima lingia Martina Hingis, franc ina da las pli grondas figuras insumma dals davos decennis.

Sa legrar dastgan ils fans da sport en Svizra era sin l'onn 2018. Sper ils gieus olimpics d'enviern il favrer a Pyeongchang en la Corea dal Sid vegni la stad tar in ulteriur punct culminant, ils campiunadis mundials da ballape en Russia, danovamain cun la naziunala Svizra ch'ha pudì sa qualifitgar suenter avair gudagnà il duel da barrage cunter l'Irlanda dal Nord.

RR actualitad