Siglir tar il cuntegn
Inhalt

Naziunal/Internaziunal Recurs refusà: Michel Platini resta suspendì

Il schef da l’Uefa Michel Platini resta suspendì. La Curt internaziunala da sport TAS ha refusà il recurs dal president da l'uniun da las associaziuns da ballape europeicas cunter sia suspensiun da 90 dis. Uschia manchenta el damaun era l'extracziun da las gruppas dal campiunadi europeic a Paris.

Il president suspendì da l'UEFA Michel Platini.
Legenda: La TAS ha confermà la suspensiun da la Fifa cunter Platini. Quella na vegn probabel betg prolungada. Keystone

La bloccada provisorica cunter Platini na vegn betg prolungada sur ils 90 dis. Quai ha decis la Curt internaziunala da sport. La cumissiun etica da la Fifa aveva suspendì Platini ils 7 d’october per tut las activitads en connex cun ballape. Il fund davos è in pajament dal 2011 a Platini da 2 milliuns francs tras Sepp Blatter. Il president da la Fifa Blatter è entant medemamain suspendì.

Il cumbat per il tron

Cun l’aboliziun da la suspensiun vuleva Platini segirar la pussaivladad da sez pudair candidar per il presidi da la Fifa ils 26 da favrer 2016. Lura vul la federaziun mundiala eleger in successur per Blatter. Il duo da funcziunaris pretenda che la summa da 2 milliuns francs eran onuraris per la lavur da Platini sco cussegliader da la Fifa tranter 1998 e 2002

RR novitads 11:00