Siglir tar il cuntegn

Header

cuntegn

Naziunal/Internaziunal Real Madrid gudogna cunter l'AS Roma

En la partida da la Champions League tranter Real Madrid e l’AS Roma gudogna Real ordaifer cun 2:0. In dals gols marca il grond star da Real Cristiano Ronaldo.

Per questa victoria ha Real stuì dar tut. L’AS Roma ha pretendi tut dals «roials» da Madrid, quai surtut en l’emprima mesadad dal gieu. Bunas schanzas aveva la Roma dentant mo paucas. Per la differenza han ils Madrilens procura pir suenter pausa. En la 57avla minuta marca il grond star da Real Madrid Cristiano Ronaldo il gol tar 1:0. Curt avant la fin dal gieu marca Jese Rodriguez il gol decisiv.

Er Wolfsburg gudogna ordaifer

Il VfL Wolfsburg po festivar l’emprima victoria en l’otgavel final da la Champions League. Per omaduas equipas Wolfsburg e Gent era quai l’emprima partida insumma en la Champions League. L’equipa da la Bundesliga gudogna cunter KAA Gent ordaifer cun 3:2. Il pli impurtant giugader da Wolfsburg era Julian Draxler. Il giugader offensiv dal mez ha gist marcà 2 gols. En la fasa finalas dal gieu ha Wolfsburg anc laschà vegnir pli datiers ils Beltgs. Lez han nizzegià la schanza ed anc pudì marcar dus gols tras Sven Kums e Kalifa Coulibaly. Tar Wolfsburg ha il giugader da l’equipa naziunala Ricardo Rodriguez giugà l’entira partida. Il goli Diego Benaglio è il mument blessà ed ha manchentà la partida.

RR novitads 23:00

Artitgels legids il pli savens