Siglir tar il cuntegn
Inhalt

Naziunal/Internaziunal Real Madrid defenda il titel e scriva istorgia

En il final da la Champions League a Cardiff ha Real Madrid battì Juventus Turin cun 4:1. Per la differenza ha il ballet roial procurà cun trais gols suenter la pausa. En las emprimas 45 minutas èsi stà Juve ch'ha plitost dictà il gieu.

Real Madrid po defender il titel da la Champions League

  • Il trenader da Real Madrid Zinédine Zidane ha fatg il nunpussaivel pussaivel: el ha pudì defender il titel cun sia squadra.
  • Dus gols per Real Madrid ha sajettà Cristiano Ronaldo en la 20avla minuta e 64avla minuta. Quai èn stads ils gols 104 e 105 en 140 gieus da la Champions League - record. Ils dus ulteriurs gols per Real han sajettà Casemiro e Marco Asension.
  • Il sulet gol per Juventus Turin ha Mario Mandzukic sajettà en la 27avla minuta agl 1:1.

In duell dals 2 gigants dal ballape

Igl è stà in duel tranter dus gigants dal ballape, induel tranter duas filosofias. La defensiun magica da Juve encunter il ballet offensiv da Real. Ils defensurs da Juve enturn Leonardo Bonucci e Giorgio Chiellini han laschà far en quella Champions League mo trais gols, igl è actualmain la meglra defensiun dal mund. Da l'autra vart spetga l'offensiva da Real enturn Cristiano Ronaldo, Karim Benzema e Gareth Bale ch'han sajettà 32 gols a quai turnier, uschè blers sco nagin auter.

Juventus vul finalmain puspè triumfar

Oz vegn scrit in nov capitel. In'egliada en las statisticas fan ils Talians dentant il meglier d'evitar. Juventus è gia stà otg giadas en il final dal pli impurtant turnier europeic, sis giadas ha Juve dentant pers. Ussa spetga il club talian gia dapi 21 onns sin in success sin il parchet internaziunal. Tut auter Real Madrid. Ils Spagnols han gudagnà ils davos tschintg finals en la Champions League e cun 11 titels ord 14 finals ha Real ina grondiusa quota.

Real vul scriver istorgia

Juventus vul sa chapescha er far revantscha per la terrada en il davos final encunter Real, il 1998. Avant 20 onns vevan ils Talians pers cun 0:1. Real survegn da l'auter maun la schanza da scriver istorgia a Cardiff a Wales. Gartegi al ballet roial da gudagnar il titel fiss l'equipa da Madrid l'emprima che vegniss da defender il titel en la Champions League. Avant in onn vevan ils Madrilens battì en il final Atlético Madrid suenter sajettar penaltis.

Zinédine Zidane
Legenda: Zinédine Zidane, trenader da Real Madrid. Keystone

Inscunter spezial per Zinédine Zidane

En il center stattan questa saira gest plirs giugaders. Ina gia franc Cristiano Ronaldo, actualmain il meglier giugader dal mund - il superstar. Lura il trenader da Real Madrid, Zinédine Zidane. El è pir dapi l'entschatta 2016 trenader da Real, ha dentant gia rimnà trofeas en seria. Onn ha Zidane manà Real Madrid al titel en la Champions League, quest onn al titel da campiun spagnol, l’emprim dapi tschintg onns. Per «Zizou» vegni questa saira è tar in inscunter tut spezial. Dal 1996 enfin il 2001 ha Zidane giugà per Juventus Turin. Cun Juve è el daventà duas giadas campiun talian, n’ha dentant mai triumfà en la Champions League, duas giadas pers il final, ina gia encunter Borussia Dortmund ed ina gia encunter Real Madrid. Oz è Zidane trenader da Real, en il cor restia el dentant per adina in «Juventino», uschia Zinédine Zidane.

Buffon vul cumplettar ses plamares

Da la vart da Juventus figurescha medemamain in grond num, il goli Gianluigi Buffon. L'icona taliana vul gudagnar ses davos grond titel che manca anc en ses palmares e sia lunga carriera, il titel da la Champions League. Duas giadas ha Buffon gia giu la schanza en il final, duas giadas dentant stuì sa cuntentar cun la medaglia d'argient. Oz survegn Buffon la terza schanza. Perda el era quest final, èsi pussibel che quella trofea resta mo pli in siemi dal goli da 39 onns ch'ha dà ses debüt en la Serie A cun 17 onns.

Duel tudestg tranter Khedira e Kroos

En il final tranter Juventus Turin e Real Madrid vegni era tar il duel tranter ils dus giugaders tudestgs d'amez Sami Khedira e Toni Kroos. Khedira e Kroos èn il cor da la naziunala tudestga, l’actual campiun mundial. Oz n’èn els per ina gia durant 90 minutas betg amis, mabain adversaris. Malgrà ch'els dattan tar lur clubs sin la medema posiziun èn lur filosofias fitg differentas. Khedira da Juve persvada cun sia fermezza fisica, Kroos cun sia eleganza e precisiun.

Lichtsteiner il quart svizzer che gudogna la Champions League?

Tranter tut ils stars figurescha er in Svizzer. Il defensur da Juve, Stephan Lichtsteiner è il quart svizzer che survegn la schanza da gudagnar quella trofea. Enfin uss han sulet Stéphane Chapuisat cun il BVB e Ciriaco Sforza e Xherdan Shaqiri cun Bayern München triumfà en la Champions League.

Il 2015 aveva Lichtsteiner pers il final cun Juventus Turin encunter il FC Barcelona cun 1:3. Avant dus onns vev’il defensur da la naziunala Svizra giugà durant 90 minutas. Oz sto Stéphan Lichtsteiner pli probabel sa cuntentar cun la rolla da reserva. Ses concurrent Dani Alves è numnadamain en ina top furma. Triumfescha Juventus gudagnass Lichtsteiner er il triple en questa stagiun.

Dus clubs - ina trofea! Il final da la Champions League tranter Juventus Turin e Real Madrid cumenza questa saira a las 20:45 uras a Cardiff.

RR sportissimo 17:00