Rafael Ratti – ina nova fatscha tranter ils trenaders da passlung

I dat ina nova fatscha en la gruppa da trenaders da passlung da Swiss-Ski. Igl è Rafael Ratti da Madulain. Dapi questa stad è el trenader da la gruppa 2 da Swiss-Ski enturn Gianluca Cologna.

Rafael Ratti.

Legenda da maletgs: Rafael Ratti. Swiss-Ski, Andreas Münger

Rafael Ratti è in giuven trenader. El ha pir 32 onns, è pia tuttina vegls sco Toni Livers e mo in onn pli vegls che Curdin Perl ch'èn anc adina activs en la cuppa mundiala da passlung.

Pli baud eran Perl, Livers e Ratti concurrents e collegas d'equipa. Els han bleras reminiscenzas communablas. La pli interessanta: Ratti ha fatg ina suletta cursa en la cuppa mundiala. Exact quella che Toni Livers ha gudagnà – Tavau Nordic 2007. Uss sa cruschan lur vias puspè.