Siglir tar il cuntegn
Inhalt

Naziunal/Internaziunal Quintana trai ora la «maglia rosa» a Dumoulin

Midada a la testa dal classament general da la 100avla ediziun dal Giro d’Italia. Nairo Quintana ha gudagnà enavos la «maglia rosa» da l’Ollandais Tom Dumoulin. Gudagnà la 19avla etappa ha il Spagnol Mikel Landa.

Nairo Quintana
Legenda: Il Columbian Nairo Quintana va sco leader en la davosa fin d'emna dal Giro d'Italia. SRF

Gronda tensiun al Giro d’Italia avant la davosa fin d’emna. En il classament general èn ils emprims quatter ciclists sulet 53 secundas in ord l’auter. Nov leader suenter la 19avla etappa sur 190 kilometers da Innichen vers Piancavallo è Nairo Quintana. Il Columbian maina 38 secundas avant Tom Dumoulin. Terz è il mattadur local, il Talian Vincenzo Nibali cun in retard da 43 secundas. Quart cun in retard da 53 è il Franzos Thibaut Pinot.

Dumoulin vinavant cun bunas schanzas

Damaun sonda suonda la davosa etappa en ils culms da Pordenone vers Asiago, ina etappa da 190 kilometers. Quintana sto augmentar ses avantatg a la testa sin Tom Dumoulin vul el avair schanzas realistas da gudagnar il Giro d’Italia 2017. En l’etappa finala, in cursa encunter l’ura sur 30 kilometers da Monza vers Milaun a Dumoulin gronds avantatgs e la schanza da gudagnar bler temps envers ses gronds concurrents.

Landa gudogna solo

La 19avla etappa ha gudagnà Mikel Landa. Il Spagnol ha gudagnà solo. Ils favurits en il classament general han tuts pers passa otg minutas sin Landa. Tom Dumoulin ha schizunt pers 9:30 minutas, 69 secundas dapli che Nairo Quintana che veva gia purtà durant la 9avla etappa la «maglia rosa».