Siglir tar il cuntegn
cuntegn

Naziunal/Internaziunal Quintana gudogna grazia a la giuria

Ilnur Zakarin ha traversà suenter 174 kilometers sco emprim la lingia da l’arrivada en la segunda etappa dal Tour de Romandie da Moudon vers Morgins. Damai ch’il Russ ha dentant impedì Nairo Quintana en il sprint final ha la giuria annullà questa victoria e numnà Quintana sco victur.

Nairo Quintana e Ilnur Zakarin.
Legenda: Ilnur Zakarin (dretg) ha sa legrar memia baud. Keystone

Ilnur Zakarin è stà il sulet ciclists ch’ha tegnì pitg en la segunda etappa cun il Columbian Nairo Quintana. 6,5 kilometers avant l’arrivada sin via vers Morgins sin 1335 meters sur mar ha Quintana attatgà. Zakarin è stà il sulet ch’ha pudì reagir.

En il sprint final ha Zakarin bain battì il Columbian, quai dentant cun meds nunsportivs. En la davosa curva ha il Russ stuschà Nairo Quintana a l’ur da la via.

Quintana nov leader dal TdR

Nairo Quintana n’ha betg mo gudagnà l’etappa, il Columbian è er il nov leader dal Tour de Romandie. El ha surpiglià la testa dal Spagnol Jon Izaguirre. Quintana maina 18 secundas avant Ilnur Zakarin. Meglier svizzer è Mathias Frank sco 6avel cun in retard da 33 secundas.

Dus dals gronds favurits han stuì magunar in dir di. L’Australian Richie Porte ha dà si il Tour de Romandie gia la damaun pervia da problems cun il magun. Il Brit Chris Froome ha gì curt avant l’arrivada in defect ed ha uschia pers bler temp.

RR novitads 18:00