Siglir tar il cuntegn

Header

Navigaziun

Il skiunz svizzer Gino Caviezel.
Legenda: Gino Caviezel ha cumbattì per la Svizra en la concurrenza da las naziuns. Keystone
cuntegn

Naziunal/Internaziunal Puspè aur per l'Austria - tgirom per la Svizra

La squadra svizra ha per pauc manchentà ina medaglia a l'uschènumnà "event da team" al campiunadi mundial da ski alpin a Vail/Beaver Creek. En il cumbat per bronz han las Svizras ed ils Svizzers stuì ceder a la Svezia. L'Austria ha defendì ses titel.

En il final pitschen ha la Svizra pers cun 1:3 cunter la Svezia. Wendy Holdener è vegnida disqualifitgada pervi d'in sbagl, Gino Caviezel e Michelle Gisin han pers lur duells cunter ils cuntraparts svedais. La victoria da Justin Murisier è la finala mo anc stada cosmetica da resultats.

Pers il mezfinal cunter l'Austria

En il mezfinal aveva la squadra svizra stuì ceder a l'Austria, ch'ha la finala gudagnà, ed uschia defendì ses titel. Era cunter l'Austria ha la Svizra fatg in 1:3. Lura era però Wendy Holdener stada la suletta ch'ha pudì dumagnar ses cuntrapart austriac Michaela Kirchgasser.

L'Austria ha defendì il titel

En il final grond ha l'Austria lura gudagnà cunter il Canada cun 3:1, ed ha uschia defendì ses titel. Per l'Austria è quai il terz titel da campiun mundial en il "event da team". La Svizra era l'ultima sin il podest dal "event da team" tar il campiunadi mundial da ski alpin 2007 ad Are. (RTR/si/uca)