PSG gudogna cunter Chelsea

Al cumenzament da la fasa da k.o da la Champions League ha Paris Saint-Germain batti Chelsea. En l’emprim gieu d’otgavelfinal han ils Franzos gudagnà meritadamain cun 2:1.

Edinson Cavani (dretg) celebrescha ses gol ensemen cun David Luiz.

Legenda da maletgs: Edinson Cavani (dretg) celebrescha ses gol al 2:1 ensemen cun David Luiz. Keystone

Procurà per decisiun tranter il PSG e Chelsea ha Edinson Cavani. Il giugader dal Uruguay ha tutg 12 minutas avant la fin dal gieu e be quatter minutas suenter ch’el era sin il plaz al 2:1. Igl è stà il segund gol da Cavani en questa stagiun da la Champions League.

La victoria per l’equipa da Paris è bain meritada, pertge ils Franzos èn stads bun 60% en possess da la balla ed els han er gì las bleras schanzas da gol.

«Ibrakadabra» cun ses 46avel gol en la Champions League

Ils dus emprims gols èn crudads curt avant la pausa. L’emprim ha il superstar dal PSG, il Svedais Zlatan Ibrahimovic tuc suenter in culp liber al 1:0. Praticamain cun il tschivel da pausa ha John Obi Mikel pudì egualisar per Chelsea suenter in corner.

Grazia al gol che Chelsea ha sajettà a Paris restan las schanzas da quartfinal intactas per l’equipa da Londra. In 1:0 en trais emnas a chasa tanschess a l’equipa da Guus Hiddink per eliminar il favurit PSG.

Benfica Lissabon celebrescha la victoria encunter Zenit St. Petersburg.

Legenda da maletgs: Benfica Lissabon procura en la davosa minuta per ina festa da ballape en l’Estadio da Luz. Keystone

Benfica en la davosa secunda

En il segund gieu da l’otgavelfinal da la Champions League ha Benfica Lissabon battì Zenit St. Petersburg cun 1:0. Il sulet gol per ils Portugais en l’Estadio da Luz ha sajettà il Brasilian Jonas en la 91avla minuta.

Per il gieu da return ston ils trenaders modelà enturn lur equipas. Dus giugaders da mintga equipa na dastgan betg giugar suenter ina carta melna, respectiv ina carta cotschna.

Ils ulteriurs duels d’otgavelfinal en la Champions League: AS Roma – Real Madrid, KAA Gent – VfL Wolfsburg, Arsenal – Barcelona, Juventus Torino – Bayern München, Dynamo Kiew – Manchester City, PSV Eindhoven – Atlético Madrid