Siglir tar il cuntegn

Naziunal/Internaziunal PSG e Arsenal – diras nuschs per il club da ballape da Basilea

L’FC Basilea frunta en la fasa da gruppa da la Champions League dasper il campiun franzos PSG er sin Arsenal Londra e sin Ludogorez Rasgrad.

L'FC Basilea en la gruppa A.
Legenda: L'FC Basilea en la gruppa A. SRF

La sort ha purtà al campiun svizzer l’FC Basilea attractivs adversaris. Uschia vegn l’FCB a giugar cunter Paris Saint-Germain, Arsenal Londra e sin l’equipa bulgara da Ludogorez Rasgrad.

Duel dals frars Xhaka

Uschia vegn quai er en la Champions League tar il duel tranter ils dus frars Granit Xhaka (Arsenal Londra) e Taulant Xhaka (FC Basilea). Cunter Arsenal ma er cunter l’equipa da Paris n'ha Basilea anc mai giugà. Ils Bulgars perencunter enconuscha l'FCB. Il 2013/14 era Basilea gia fruntà sin Ludogorez Rasgrad en ils playoffs per la Champions League, in onn pli tard ha Basilea giugà en la fasa da gruppa cunter l’equipa bulgara. Ina giada ha l’FCB pers cun 0:1 perencunter l’autra partida gudagnà cun 4:0.

Cristiano Ronaldo è il giugader da ballape da l'Europa 2015/16

Suenter ch'ì era vegnì tratg la sort per las gruppas da la Champions League è il Portugais vegnì elegì da schurnalists dals pajais commembers da la federaziun da ballape europeica a Monaco sco meglier ballapedist da l’Europa. Ronaldo ha gudagnà l'elecziun avant il valis Gareth Bale ed il franzos Antoine Griezmann.

RR novitads 20:00