Siglir tar il cuntegn
Inhalt

Naziunal/Internaziunal Prova generala na gartegia betg a Schurter

En la cursa da la cuppa svizra a Muttenz/Basilea è Schurter vegnì mo 23avel cun passa quatter minutas e mesa retard sin il victur Samuel Gaze da la Nova Zelanda. Il Talian Gerhard Kerschbaumer ed il Svizzer Matthias Stirnemann han cumplettà il podest.

Mountainbiker
Legenda: Per ina giada betg stà il meglier: Nino Schurter. Keystone

En la cuppa mundiala da mountainbike n’è Nino Schurter percunter betg da batter en questa stagiun. Da las tschintg cursas da fin qua ha il campiun olimpic e mundial gudagnà tuttas tschintg. Uschia ha il Sursilvan gudagnà la cuppa mundiala anticipadamain.

Surpraisa tar las dunnas

Er tar las dunnas n’ha betg la favorita gudagnà: Jolanda Neff ha stuì sa cuntentar cun il segund plaz a Muttenz davos la victura Sina Frei, la campiunessa europeica da las U23. Terza è vegnida Alessandra Keller.

Per Jolanda Neff va uschia ina bella seria a fin. Las davosas 15 giadas ch'ella è stada da la partida ad ina cursa da la cuppa svizra ha ella adina gudagnà, fin oz.

Vital Albin tar ils U23

Malgrà che Nino Schurter n’ha per quella giada betg gudagnà ha ses Club da velo Surselva tuttina dastgà sa legrar d'ina victoria. Vital Albin che vegn sco Schurter da Tersnaus ha gudagnà en la categoria dals U23. Andrin Beeli da Sagogn è vegnì novavel ed Ursin Spescha da Sevgein 23avel.

Prova generala per Cairns

La cursa da la cuppa svizra a Muttenz è stada il davos test serius per ils mountainbikers svizzers. En 10 dis partan Nino Schurter, Jolanda Neff, Vital Albin ed ils ulteriurs mountainbikers en direcziun da l’Australia. A Cairns emprova Schurter da defender ses titel da campiun mundial. I fiss ses sisavel titel.

Sportissimo 17:00