Suenter tschintg onns pausa è la Champions Hockey League puspè vegnida lantschada la stagiun passada. Il titel ha gudagnà Lulea HF che battì en il final svedais l’equipa da Frölunda HC Göteborg. Da las sis equipas svizras han sulet Genevra-Servette e Fribourg-Gottéron cuntanschì la runda da K.o. Per omaduas equipas da la Svizra Franzosa è il turnier dentant stà a fin suenter ils otgavels-finals.
48 enstagl 44 equipas
En cumparegliaziun cun l’onn passà èn quest onn 48 equipas da la partida. I vegn giugà da nov en gruppas da trais equipas enstagl da quatter equipas. Suenter la fasa da gruppa sa qualifitgeschan las meglras duas equipas da mintga gruppa ils sedeschavels-finals che cumenzan ils 22 da settember. Il final da la Champions Hockey League è ils 9 da favrer 2016.
HCD remplazza ils Kloten Flyers
Er quest onn èn sis equipas svizras da la partida en la Champions Hockey League. En cumparegliaziun cun la davosa ediziun remplazza il Club da hockey da Tavau dentant ils Kloten Flyers. Il campiun svizzer cumenza dentant quest turnier cun in cader limità. Dals trais giugaders esters stat sulet Marcus Paulsson a disposiziun. Plinavant mancan er Félicien Du Bois e Dino Wieser. En la fasa da gruppa frunta il HCD l’emprim ordaifer sin Färjestad da la Svezia, sonda suonda il gieu ordaifer encunter l’equipa tscheca Pardubice.