Siglir tar il cuntegn

Naziunal/Internaziunal Piranha egualisescha cunter ils Skorps

Piranha Cuira ha gudagnà il segund gieu da playoff mezfinal encunter Skorpion Emmental Zollbrück ed uschia egualisà la seria da best of five al 1:1. Las giugadras da Cuira han battì a chasa ils Skorps cun 4:3.

Piranha Cuira, stagiun 2015/2016.
Legenda: Piranha Cuira, stagiun 2015/2016. mad

Sco gia en l’emprim duel da mezfinal èsi stà in gieu fitg stretg tranter Piranha Cuira ed Emmental Zollbrück, questa giada dentant cun la meglra fin per il defensur dal titel. La decisiun è crudada pir en il davos terz.

En la 46avla minuta Seraina Ulber sajettà il 3:2, be 4 minutas pli tard ha Katrin Zwinggi pudì augmentar al 4:2. La reacziun d’Emmental Zollbrück, l’equipa che vegn trenada dal Sursilvan Aldo Casanova, è vegnida memia tard. 51 secundas avant la fin han ils Skorps scursanì al 3:4, quai en powerplay.

Emmental Zollbrück resta ina dira nusch

La victoria da Piranha Cuira n’è nagina surpraisa, vala l’equipa da la chapitala grischuna dapi intgins onns sco la gronda figura en il sport dad unihockey en Svizra.

Cun Emmental Zollbrück ha Piranha dentant chattà in adversari che vegn da tegnair pitg cun las giugadras da Cuira. Gia en la qualificaziun aveva Emmental Zollbrück battì Piranha Cuira en dus da trais duels. Ina victoria da 4:3 suenter prolungaziun hai lura er dà en l’emprim duel da playoff mezfinal.

Ed er en il segund duel n’avess mancà pauc per in’ulteriura surpraisa. Suenter 40 minutas stevi numnadamain 2:2. Ils emprims dus gols da Piranha han mintgamai sajettà il topscorer da Cuira, Sonja Putzi, quai sin pass dal chapitani, Seraina Ulber.

Be 24 uras pausa

Ditg n'han las duas equipas betg peda da serevegnir. Strusch 24 uras suenter quest segund gieu vai gia vinavant cun la seria da mezfinal.

Dumengia, ils 3 d’avrigl a las 19:30 uras, frunta Piranha Cuira puspè ordaifer sin Skorpion Emmental Zollbrück. A chasa ha l’equipa d’Aldo Casanova da Mustér anc mai pers encunter l’equipa da Cuira en questa stagiun.

En l’autra seria da mezfinal ha Wizards Berna Burdorf battì il victur da la qualificaziun, UHC Dietlikon, cun 6:5 ed uschia egualisà la seria al 1:1.

Malans perda er il segund gieu

En la seria da mezfinal dals umens tranter l’UHC Alligator Malans e Floorball Köniz hai dà la segunda terrada per l’equipa grischuna. Malans ha pers a chasa cleramain cun 3:7. En la seria da best of seven maina il favurit e victur da la qualificaziun cun 2:0.

Alligator Malans ha dà ord maun quest segund gieu pir en las davosas minutas. Fin la 50avla minuta era il resultat anc 3:3. En las davosas 10 minutas ha Köniz pudì sajettar 4 gols ed uschia fa tut cler a Maiavilla avant passa 1’000 fans.

En l’autra seria da mezfinal ha HC Rychenberg Winterthur battì il Grasshopper Club Zürich cun 5:2 ed uschia pudì egualisar la seria da best of seven al 1:1.