Piranha Cuira vul defender il titel

Gudagnar per la 5avla giada en seria il titel da campiun svizzer, quai la gronda finamira dal club d’unihockey da las dunnas Piranha Cuira. Malgrà la dominanza dals davos onns ha Piranha terminà quest onn la qualificaziun be sin il terz plaz da la tabella.

L'equipa da Piranha Cuira la stagiun 2015/2016.

Legenda da maletgs: L'equipa da Piranha Cuira la stagiun 2015/2016. mad

En ils playoffs da quartfinal frunta l’equipa da la chapitala grischuna uschia sin Zug United, ina dira nusch. Encunter Zug n’ha Piranha Cuira betg fitg bunas regurdientschas. En la qualificaziun ha Piranha numnadamain pers dus dals trais duels encunter l’equipa da la Svizra centrala.

Buna partenza – nauscha fin

Suenter ina buna partenza en il campiunadi cun 13 victorias en ils emprims 14 gieus n’è betg tut ir sco giavischà a la fin da la qualificaziun per Piranha. Dals davos 7 gieus ha l’equipa grischuna stuì magunar 4 terradas. Tuttina vala Piranha Cuira sco il grond favurit en la seria da playoff quartfinal encunter Zug United. La finamira è da cuntanscher il superfinal, ils 30 d’avrigl a Kloten. Sper Piranha Cuira vala oravant tut l’UHC Dietlikon sco in dals gronds favurits sin in titel.

Cuira Unihockey ed Alligator Malans avant in grev pensum

Ina dira seria da quartfinal spetga sin las duas equipas grischunas dals umens. Cuira Unihockey ch’ha terminà la qualificaziun sin il 6avel plaz frunta en il quartfinal sin il Grasshopper Club Zürich ch’astga lantschar quella seria da best of seven a chasa.

Alligator Malans ha terminà la qualificaziun sin il 7avel plaz e frunta en il quartfinal sin il SV Wiler-Ersigen. Er Malans sto cumenzar la seria ordaifer. Wiler-Ersigen è il grond favurit e defensur dal titel. Avant in onn vevan ils Bernais gudagnà il superfinal encunter Malans cun 6:5 e festivà il 10avel titel da campiun svizzer.