Siglir tar il cuntegn

Header

cuntegn

Naziunal/Internaziunal Piranha Cuira gudogna final dramatic ed uschia 6avel titel

Era quest onn gudognan las dunnas da Piranha Cuira - gia il 6avel titel da campiunessas svizras en seria. En in final dramatic ha Cuira battì Dietlikon cun 5:4 suenter penaltis. Quai suenter che Dietlikon era anc cun 3:1 en avantatg suenter 45 minutas.

Ditg pareva quai da daventar in triumf da Dietlikon. En la 47avla minuta eran las Turitgaisas anc en avantatg cun 3:1. Entaifer mo 7 minutas ha Piranha Cuira dentant marcà 3 gols ed uschia vulvì la partida al 4:3. Mo era las dunnas da Dietlikon han pudì reagir ed anc egualisar al 4:4. Uschia ch’il gieu è i en la prolungaziun.

Seraina Ulber
Legenda: Piranha Cuira cun il capitani Seraina Ulber è per la 5avla giada en seria campiun svizzer. Keystone

Finiziun dramatica

Cunquai ch’i n'ha dà nagins gols là, ha la lutga da penaltis stuì decider. Ditg ha nagina giugadra tutgà en la lutga dramatica. 14 giugadras n’han betg pudì marcar.

Cun la 15avla emprova da penalti ha lura Katri Luomaniemi pudì marcar sco emprima. La giugadra da Dietlikon Ann-Sofie Sundholm ha anc gì la schanza d’egualisar.

Quai n’è dentant betg gartegià, uschia che Piranha Cuira po festivar il 6avel titel da campiun svizzer en seria.

Il cumbat per il titel da campiun svizzer è vegnì decis per la segunda giada en in superfinal. Quai vul dir ch'i n’ha betg dà ina seria sco en ils playoffs, mabain be in sulet gieu - e quel ha decis.

GC va per emprim titel da campiun svizzer

GC Unihockey gudogna l’emprima giada il final dals umens – malgrà in super start dal Floorball Köniz – cun 10:8.

Per omaduas squadras èsi stà il cumbat per l’emprim titel da campiun svizzer. Svelt pareva quai che Berna giaja per la trofea. L’avantatg da 4:1 ha dentant purtà be instabilitad al gieu dals da Köniz.

Sut la batgetta da l’attatgader Kim Nilsson ha GC surpiglià il timun e fatg ina seria da sis gols fin la fin dal segund terz. Dentant han ils Turitgais anc tremblà intginas giadas fin ch’il resultat final da 10:8 è stà fix.

RR novitads 15:00 / 20:00 / Sportissimo 17:00

Artitgels legids il pli savens