Siglir tar il cuntegn

Header

cuntegn

Naziunal/Internaziunal Philipp Degen terminescha sia carriera

Il ballapedist da 33 onns da l'FC Basilea terminescha sia carriera da ballapedist. Quai ha il defensur dà enconuschent trais emnas suenter ch'el è danovamain sa blessà al givè.

Ses ultim gieu en la Super League ha Degen fatg ils 13 da mars cura che Basiela ha giugà cunter l'FC Son Gagl. En quest gieu aveva el dà ses comeback suenter quatter mais e mez. Tar ina crudada en il gieu è Degen danovamain sa blessà al givè, en il medem lieu.

«Ins sto tadlar sin ils signals dal corp» ha ditg Degen, ch'è stà set giadas campiun svizzer ed ha gudagnà trais giadas la Cuppa da ballape svizra. «Jau ma legr da mes avegnir suenter il temp sco ballapedist professiunal» ha ditg Degen. Il 1995 è Philipp Degen vegni tar ils juniors da l'FCB, quai ensemen cun ses frar schumellin David. Lez è sa retratg il 2014.

Dapi ses debut d'avant bunamain 15 onns ha il ballapedist absolvì passa 200 partidas per il campiun svizzer da seria. Tranter il 2005 ed il 2011 è Degen er stà activ en la Bundesliga tar Stuttgart e Dortmund ed en l'Engalterra tar Liverpool.

Per la squadra naziunala svizra Philipp Degen giugà dal 2005 fin il 2009 en total 32 partidas.

RR novitads 17:00

Artitgels legids il pli savens