Siglir tar il cuntegn
cuntegn

Naziunal/Internaziunal Per la Svizra è il quartfinal la davosa staziun

La squadra naziunala da hockey perda la partida da quart-final dal campiunadi mundial a Paris. Cunter la Svezia perdan ils Svizzers – malgrà ina ferma prestaziun - cun 1:3.

Giugaders da hockey che miran trumpads
Legenda: Fatschas trumpadas suenter ch’ils Svizzers han pers cunter la Svezia. Keystone

Il sulet gol svizzer al pari 1:1 intermediar, ha sajettà Gaëtan Haas. La Svizra sa ranghescha uschia sin plazza 6 da quest campiunadi mundial.

In duel nordic en ils mezfinals

En ils mezfinals frunta ina giada la Svezia sin la Finlanda. Ils Finlandais èn sa qualifitgads cun ina victoria cunter ils Stadis Unids. La defensiun finlandaisa è stada stabila, e fin il 2:0 dals Finlandais en la 47avla minuta èn ils Americans mo vegnì da sajettar 15 giadas sin il gol.

En il segund mezfinal gioga la Russia cunter il defensur dal titel il Canada. La Russia ha battì il suentermezdi la Tschechia cun 3:0. E la saira n'han ils Tudestgs betg nizzegià l'avantatg da pudair giugar a chasa, ed han pers cunter ils Canadais cun 1:2.

Sonda suondan ils mezfinals

Ils dus mezfinals han lieu la sonda. Il suentermezdi è la partida Canada - Russia, la saira sa duelleschan lura la Svezia e la Finlanda.

RR novitads 23:00