Siglir tar il cuntegn
cuntegn

Naziunal/Internaziunal Pep Guardiola banduna Bayern – Carlo Ancelotti surpiglia

Quai ch’ins ha speculà gia daditg, è ussa uffizial: Il trenader Pep Guardiola banduna il club da ballape Bayern München la fin da la stagiun. Ses successur vegn il Talian Carlo Ancelotti.

Il Spagnol, Pep Guardiola trenescha dapi il 2013 il FC Bayern München.
Legenda: Il Spagnol, Pep Guardiola trenescha dapi il 2013 il FC Bayern München. Keystone

Il trenader da ballape Pep Guardiola va davent dal Bayern München la fin da questa stagiun. Sia via vegn probabel a manar el en la Premier League tar Manchester City. «Nus essan engraziaivels a Guardiola per tut, quai ch’el ha dà a noss club e nus sperain che nus possian en questa stagiun anc festivar blers success ensemen», uschia il schef da la suprastanza dal club, Karl-Heinz Rummenigge. «Cun Ancelotti vegn in ulteriur trenader tar il FC Bayern, ch’ha gì bler success.»

Carlo Ancelotti, ch’è stà fin la stad anc trenader da Real Madrid, duai avair suttascrit in contract da trais onns fin il 2019 tar Bayern München.